Exo 23 | ZomZIV | STEP | Zuauthu gen kei un. Elna hanga tecipanna tawh migilopa huh kei un.

Exodus 23

Thutan’na le Lainatna Ngeinate

1 Zuauthu gen kei un. Elna hanga tecipanna tawh migilopa huh kei un.

2 “Khialhna bawl dingin mihonpi nung na zui kei un. Thusia kineihna-ah teci-a na pan ciangun mi tam lamlamah kopin thutang deihkaih kei un; 3 ama thuneihna ah mizawngpa na angvan tuan kei un. ^a

4 “Na galte bawngtal ahikeh laa khat, a gammang na tuah khak uh leh ama kiangah hawl kik pelmawh un. 5 Nang hong mudah mipa laa van pua-a tuk na muh uh leh nusia mawk kei un; tua gan tungtawnin amah na huh ding uh hi. ^b

6 “Na mipih a zawngte thu kineihna tungtangah thutang gen ding na nial kei un. 7 Zuauthu-a kingawhna-ah kikum kei unla, mawhpengpa le midikpa thatsak kei un, ahang in, a mawh mi ka suaktasak kei ding hi. ^c

8 “Golhsum in amaute mit humsaka thumaan thu kawnghek ahi manin golhguk sum na la kei ding uh hi.

9 “Pemta khat nengcip kei un. Egypt ah pemta-a omngei na hi manun note mahmah in pemtate thuakzia ding na thei uh hi. ^d

Sabbath Ngeinate

10 “Na lote uhah kum guk sung khaici vawhin an na la ding uh hi; 11 ahi hangin a kum sagihna kumin na lo kho loin khul in. Tua ciangin na mite laka mizawngte in tua lai pan an a ngah thei ding uh hi; amaute nusiatte gamsate in a ne thei ding uh hi. Na lenggui huan le na olive huangah zong tua bangin hih un.

12 “Niguk sung na sem in, ahi hangin na bawngtal le na laate a tawlngak theih nading le na inn sunga suak silate le pemtate in thathak a ngah theih nadingun a ni sagihna ni na sem kei un. ^e

13 “Nang tunga kong gensa thu limtakin thudon in. Adang pasiante min lo kei un; na muk pan un tuate kizasak kei un.

Kumcin Pawi Thumte

14 “Kum khatin kei ading pawi thumvei na bawl ding uh hi.

15 “Silngo-sawhloh Anlum Pawi na bawl un. Kong thupiaksa bangin ni sagih sung silngo sawh loh anlum na ne un. Abib kha a kiseh hunin na hih un, ahang in, tua kha-in Egypt pan a paikhia na hi uh hi. ^f

“Ka mai-ah kuamah khutguakin hong kilaak kei ding hi.” ^g

16 “Lo sunga na tuh uh gahmasate tawh Anlak Pawi na bawl ding uh hi. ^h

“Lo-a ansang kaihkhop khit kum bei ciangin Ansangkhum Pawi na bawl ding uh hi. ⁱ

17 “Kum khat sungin thumvei Thuneipen TOPA mai-ah mite khempeuh a kilaak ding uh hi. ^j

18 “Biakpiakna sisan tawh silngo kisawh na khatpeuh piakhawm kei un. ^k

“Keima pawi-a kipiate’ thau zingsang dong a kikem peuhmah kei ding hi.

19 “Note leitang pana piang a gahmasa a hoih pen, TOPA note Pasian, innah hong puak un. ^l

“Keelno a pi nawizu-in huan kei un. ^m

Pasian’ Vansawltak in Lampi Sial ding

20 “En un, ka bawlsa munah hong tung ding lampi tawntungah hong cing dingin note mai-ah vansawltak khat ka sawl hi. 21 Amah thusimin a genna ngai un. Amah langdo kei un; amah ah ka Min a om nungsangin hong maisak lo ding hi. 22 Ama thugen limtakin na ngaih uh a ka gen khempeuh na sep uh leh na galte’ gal ka hi dinga nang hong langdote’ ka do ding hi. 23 Na mai uhah ka vansawltak pai-in Amor-te, Hit-te, Periz-te, Canaan-te, Hiv-te le Jebus-te gam hong tun dinga keimah in amaute ka phiatmang ding hi. 24 Amaute’ pasiante’ mai-ah kun kei unla, tuate bia kei un; amau hih bang zui kei un. Tuate sucim in a suang siangthote uh na satnen pelmawh ding uh hi. 25 TOPA, note Pasian bia un; tua hileh na an uh le na tui uh tungah thupha hong pia ding hi. Note lak pan cinatna ka lakhiamang dinga, 26 na gam-uah nausia kuamah om loin tasel zong a om kei ding hi. Tekkut vuaikutin kong nungtasak ding hi.

27 “Na mai uhah ka lauhuaina ka sawl dinga, na phutkhak uh minam peuhpeuh ka buaisak ding hi. Na galte khempeuh uh ka lehtaisak khin ding hi. 28 Hiv-te, Canaan-te le Hit-te na lampi pan a hawlkhia dingin na mai uh ah zanta ka sawl ding hi. 29 Ahi hangin tua gam hawmmang in no adingin gamsa tam lua ding ahi manin kum khat sung bekin ka hawlmang kei ding hi. 30 Tua gam a luah khom dinga na khan matengun note mai-ah tawmtawmin ka hawlkhia ding hi.

31 “Na gamgi uh San Tuipi ^{▼▼31 Hebrew ah Yam Suph; tua pen Pumpeng Tuipi} pan Philistia ^{▼▼31 Tua pen Mediterranean} Tuipi le sehnel-gam pan Gun ^{▼▼31 Tua pen Euphrates} dong ka kipsak ding hi. Tua gama teng mite note khut sungah kong pia dinga, amaute na hawlmang ding uh hi. 32 Amaute ahi zongin amau pasiante tawh ahi zongin thukhun bawl kei un. 33 Na gam sunguhah amaute tengsak kei un, tua hi kei leh a pasiante uh a biakna un no adingin thangzak suak ding ahi manin amaute in note, kei tungah mawhna hong bawlsak taktak ding uh hi,” a ci hi. ^q